நடிப்பு: சூர்யா, மோகன்லால், ஆர்யா, சயீஷா

இயக்கம்: கே.வி.ஆனந்த்

இந்த படத்தை பார்த்த சூர்யா ரசிகர்கள் கொண்டாடி வந்தாலும் மக்கள் கலவையான விமர்சனங்களை கூறி வருகின்றனர். இந்த நிலையில் படத்தை பார்த்த இயக்குநர் விக்னேஷ் சிவன், எதிர்மறையாக விமர்சனம் செய்து வருபவர்களுக்குப் பதிலடி கொடுக்கும் விதத்தில் ட்வீட் செய்துள்ளார்.

அந்த ட்வீட்டில் அவர் கூறியிருப்பதாவது, 'இன்று ரசிகர்கள் ஒரு படத்தை ரசிப்பதை விட்டுவிட்டு அதைத் தோண்டுவதில் தான் அதிக கவனம் செலுத்தி வருகிறார்கள். நடிகர்கள் மற்றும் இயக்குநர்களின் முயற்சிகளைப் பாராட்டாமல் விமர்சகர்கள் புத்திசாலித்தனத்தைக் காட்டவே நினைக்கின்றனர். ஒரு படம் பல தரப்பட்ட ரசிகர்களையும் திருப்திப் படுத்த வேண்டும். இப்பொழுது சாதாரணப் பொது மக்கள் கூட விமர்சகர்களாகி விடுகிறார்கள்.

இனிமேலாவது படங்களைத் தோண்டி துருவாமல் ரசிக்கத் தொடங்குவோம். தோல்விகளை மன்னிப்போம். இவ்வுலகில் எதுவுமே முழுமையானது இல்லை. அப்படியிருக்க ஏன் ஒரு திரைப்படம் மட்டும் பெர்ஃபெக்டாக இல்லாமல் இருக்கக் கூடாது? சுவாரஸ்யமான திரைக்கதை, பல திருப்பங்கள் என்று இன்னும் பல விஷயங்களுக்காக, நான் காப்பான் படத்தை மிகவும் ரசித்துப் பார்த்தேன்.

இதில் ஆர்யாவும், மற்ற நடிகர்களும் மிக கூலாக நடித்துள்ளனர். காப்பன் அனைத்து தரப்பினரையும் திருப்திப்படுத்தும் நல்ல படம். உங்கள் குடும்பத்தோடு சென்று பாருங்கள். படத்தில் இருக்கும் தேசபக்தி தருணங்களை ரசியுங்கள்' என்று கூறியுள்ளார்.